भिवंडी (विशेष प्रतिनिधी):
काल रात्री पडघा टोल नाक्यावरून मिळालेल्या एका अत्यंत गोपनीय माहितीच्या आधारे, पांढऱ्या रंगाच्या एका संशयास्पद वाहनातून (क्रमांक: MH-05-DK-5806) गोवंशाची क्रूर कत्तल करून बेकायदेशीर वाहतूक केली जात असल्याचा सुगावा लागला. ही माहिती मिळताच बजरंग दलाचे सर्व गोरक्षक आणि स्थानिक पोलीस प्रशासन तात्काळ ‘अलर्ट मोड’वर आले आणि त्यांनी भिवंडीत मोठी नाकाबंदी लावली.
अंगावर गाडी घालत जीवे मारण्याचा प्रयत्न!
मिळालेल्या गुप्त माहितीनुसार, पोलिसांनी भिवंडी बायपास येथील ‘अतिथी लॉजिंग’जवळ कडक नाकाबंदी केली होती. संशयित वाहन जवळ येताच त्याला थांबवण्याचा इशारा करण्यात आला. मात्र, कायद्याची कोणतीही भीती न बाळगता सराईत चालकाने नाकाबंदी तोडून थेट पोलीस आणि बजरंग दलाच्या कार्यकर्त्यांच्या अंगावर गाडी घालत त्यांना जीवे मारण्याचा प्रयत्न केला. हा जीवघेणा हल्ला करून आरोपीने आपले वाहन मुंबईच्या दिशेने वेगात पळवले.
‘भूमी वर्ल्ड’च्या ट्रॅफिकमध्ये अडकला आणि रंगेहात पकडला!
या थरारक प्रसंगानंतरही पोलीस आणि गोरक्षकांनी धीर सोडला नाही. त्यांनी अत्यंत धाडसाने त्या वाहनाचा पाठलाग सुरू ठेवला. आरोपीने पळून जाण्याचा पूर्ण प्रयत्न केला, मात्र पिंपळास येथील ‘भूमी वर्ल्ड’जवळ असलेल्या जोरदार वाहतूक कोंडीत (ट्रॅफिक) हे वाहन शेवटी अडकले. याचाच फायदा घेत पाठलाग करणाऱ्या पथकाने गाडी चालकासह एका मुख्य आरोपीला रंगेहात पकडण्यात यश मिळवले.
सराईत गुन्हेगारावर ‘मकोका’ लागावा; बजरंग दलाची आग्रही मागणी
पकडण्यात आलेल्या आरोपीचा पूर्वेतिहास तपासला असता, त्याच्यावर आधीच वेगवेगळ्या पोलीस ठाण्यांमध्ये अनेक गंभीर गुन्हे दाखल असल्याचे समोर आले आहे. हा आरोपी संघटित गुन्हेगारीत सक्रिय असल्याने आणि त्याचा उपद्रव वाढल्याने त्याच्यावर कठोर कारवाई होणे गरजेचे आहे.
या पार्श्वभूमीवर, बजरंग दलाच्या वरिष्ठ पदाधिकाऱ्यांनी भिवंडी झोन २ चे पोलीस उपायुक्त (DCP) श्रीकांतजी बोराटे साहेब तसेच सहाय्यक पोलीस आयुक्त (ACP) सचिनजी सांगळे साहेब यांची भेट घेऊन सविस्तर चर्चा केली. या सराईत गुन्हेगारांवर थेट ‘मकोका’ (MCOCA – महाराष्ट्र संघटित गुन्हेगारी नियंत्रण कायदा) अंतर्गत कारवाई करण्यात यावी, अशी आग्रही मागणी यावेळी करण्यात आली. पोलीस प्रशासनाने या प्रकरणी कडक कायदेशीर पावले उचलण्याचे आश्वासन दिले आहे.
– ब्युरो रिपोर्ट, नित्यम न्यूज.
✍🏻मुख्य संपादक – सौ.स्नेहा गितेश पाटील
