इताडे गावात चोरीच्या उद्देशाने घरात घुसलेल्या संशयिताने घरची तोडफोड करत सीसीटीव्ही आणि डीव्हीआर (CCTV-DVR) फोडल्याची आणि विरोध करणाऱ्या महिलेवर लोखंडी रॉडने प्राणघातक हल्ला केल्याची धक्कादायक घटना घडली आहे. विशेष म्हणजे हा संशयित दुसरा कोणी नसून त्या महिलेच्या मुलाचाच मित्र असल्याचे समोर आल्याने परिसरात तीव्र संताप व आश्चर्य व्यक्त होत आहे.
मिळालेल्या माहितीनुसार, मारुती पाटील यांच्या घरात अक्षय अभिमन्यू पाटील याने चोरीच्या उद्देशाने प्रवेश केला. घरात घुसून पुरावे नष्ट करण्याच्या उद्देशाने त्याने CCTV कॅमेरे व DVR फोडून टाकले आणि इतर साहित्याचीही मोठी नासधूस केली. यादरम्यान मारुती पाटील यांच्या पत्नी निर्मला पाटील यांनी विरोध केला असता, मुलाचा मित्र असलेल्या अक्षयने त्यांच्यावर लोखंडी रॉडने अत्यंत जीवघेणा हल्ला केला. या हल्ल्यात निर्मला पाटील गंभीर जखमी झाल्या असून त्यांच्यावर रुग्णालयात उपचार सुरू आहेत.
आपल्याच मुलाच्या मित्राने घरात घुसून असा प्राणघातक हल्ला केल्यामुळे या घटनेचा सर्व स्तरांतून तीव्र निषेध केला जात आहे. या प्रकरणाची सखोल व निष्पक्ष चौकशी करून दोषीवर कायदेशीर मार्गाने कठोर कारवाई करण्यात यावी, अशी मागणी ग्रामस्थांकडून केली जात आहे.
