भिवंडीत नार्कोटिक्स कंट्रोल ब्युरोची मोठी कारवाई; १७४५ कोटींचे कोकेन जप्त, ड्रग्ज रॅकेटचा पर्दाफाश
भिवंडी: भिवंडी शहरात नार्कोटिक्स कंट्रोल ब्युरोने (NCB) एक मोठी कारवाई करत आंतरराष्ट्रीय ड्रग्ज रॅकेटचा पर्दाफाश केला आहे. ‘ऑपरेशन व्हाईट स्ट्राईक’ अंतर्गत भिवंडीतील एका गोदामावर टाकलेल्या धाडीत तब्बल १,७४५ कोटी रुपयांचे उच्च दर्जाचे कोकेन जप्त करण्यात आले आहे. या कारवाईमुळे संपूर्ण परिसरात मोठी खळबळ उडाली आहे.
नार्कोटिक्स कंट्रोल ब्युरोला मिळालेल्या गुप्त माहितीच्या आधारे, भिवंडीतील एका वेअरहाऊसमध्ये ड्रग्जचा मोठा साठा लपवून ठेवल्याचे समजले होते. त्यानुसार, पथकाने सापळा रचून ही धाड टाकली. जप्त करण्यात आलेल्या कोकेनचा साठा आंतरराष्ट्रीय बाजारपेठेत विकला जाणार होता, अशी प्राथमिक माहिती समोर येत आहे. या कारवाईदरम्यान ड्रग्ज तस्करीशी संबंधित काही संशयितांना ताब्यात घेण्यात आले असून, त्यांची कसून चौकशी सुरू आहे.
भिवंडी हे राज्याचे मोठे वेअरहाऊसिंग हब म्हणून ओळखले जाते. मात्र, या हबचा वापर अमली पदार्थांच्या छुप्या साठवणुकीसाठी आणि तस्करीसाठी केला जात असल्याचे या कारवाईवरून पुन्हा एकदा स्पष्ट झाले आहे. एनसीबीच्या या धाडसी कामगिरीमुळे अमली पदार्थ तस्करांचे धाबे दणाणले असून, या प्रकरणाचे धागेदोरे आंतरराष्ट्रीय स्तरावर जोडलेले असण्याची शक्यता वर्तवली जात आहे.
नित्यम न्यूज – वेगवान अपडेट्स, थेट भिवंडीतून!
✍🏻मुख्य संपादक – सौ.स्नेहा गितेश पाटील
