मुल्लानपूर: आयपीएल २०२६ मधील ४० व्या सामन्यात आज क्रिकेट चाहत्यांना एक हायव्होल्टेज मुकाबला पाहायला मिळणार आहे. गुणतालिकेत अव्वल स्थानी असलेल्या पंजाब किंग्सचा सामना राजस्थान रॉयल्सशी होत असून, राजस्थानने नाणेफेक जिंकून प्रथम क्षेत्ररक्षणाचा निर्णय घेतला आहे. मुल्लानपूरची खेळपट्टी ही फलंदाजांसाठी नंदनवन समजली जाते, जिथे सरासरी धावसंख्या २१० च्या पार जाते. त्यामुळे पंजाबचा संघ पहिल्या डावात मोठी धावसंख्या उभारून राजस्थानवर दडपण निर्माण करण्याचा प्रयत्न करेल, तर राजस्थानचे गोलंदाज, विशेषतः जोफ्रा आर्चर आणि रवींद्र जडेजा, पंजाबच्या फलंदाजांना रोखण्यासाठी सज्ज आहेत.
या सामन्यात पंजाबचा कर्णधार श्रेयस अय्यर आणि राजस्थानचा युवा तुफान वैभव सूर्यवंशी यांच्यातील वैयक्तिक झुंज पाहण्यासारखी ठरेल. पंजाबने आतापर्यंत या मोसमात सलग सहा विजय मिळवून आपले वर्चस्व सिद्ध केले आहे, तर राजस्थान आज त्यांचा हा विजयरथ रोखून गुणतालिकेत आपली स्थिती मजबूत करण्याच्या इराद्याने मैदानात उतरला आहे. दोन्ही संघांनी आपल्या ताफ्यात महत्त्वाचे बदल केले असून, ‘इम्पॅक्ट प्लेयर’ची भूमिका या सामन्यात निर्णायक ठरू शकते. मुल्लानपूरच्या या ‘रन-मशीन’ खेळपट्टीवर कोणता संघ बाजी मारणार, याकडे आता संपूर्ण देशाचे लक्ष लागले आहे.
✍🏻मुख्य संपादक – सौ.स्नेहा गितेश पाटील
